Friday, 19 April 2019

தேர்தல் - மக்களுக்கான பாடங்கள்


வாக்காளர் பட்டியல் சரிபார்ப்பு

இந்தப்பதிவில் சில கதைகளைச் சொல்கிறேன். எல்லாமே அண்மையில் நடந்த கதைகள். இவற்றில் சம்பந்தப்பட்டவர்கள் எல்லாரும் பேஸ்புக்கில் இருக்கிறார்கள்.

முந்தாநாள் இரவு இன்பாக்சில் நட்பு வட்டத்தில் இல்லாத, புதியவர் ஒருவரின் செய்தி வந்தது. சென்னையில் வசிக்கும் ஒரு பெண்மணி. அவர் கேட்ட கேள்வி என் கணவர் முகவரி மாற்றத்துக்காக விண்ணப்பம் செய்திருந்தார். மாறி விட்டதா என்று தெரியவில்லை. புதிய முகவரியிலும் கிடைக்கவில்லை, பழைய முகவரியிலும் வாக்காளர் பட்டியலில் பெயர் இல்லை. வோட்டர் ஐடி வரவில்லை. என்ன செய்வது?

அவருடைய கணவரின் விவரங்களைக் கேட்டேன். என் வழக்கமான முறையில் தேர்தல் ஆணைய வலைதளத்தில் இருக்கும் பட்டியல்களில் தேடினேன். வாக்காளர் பட்டியலில் பெயர் இருந்தது. தொகுதி, வாக்குச்சாவடி, பார்ட் நம்பர், சீரியல் நம்பர் எல்லாம் எடுத்துக் கொடுத்தேன். அங்கீகரிக்கப்பட்ட ஏதாவதொரு அடையாள அட்டையை எடுத்துச் செல்லச் சொல்லுங்கள். பூத் ஸ்லிப் கிடைக்காவிட்டாலும் பரவாயில்லை, வாக்குச்சாவடியில் அடையாள அட்டையைக்காட்டி, இந்த விவரங்களைச் சொன்னால் பட்டியலில் சரி பார்த்துவிட்டு வாக்களிக்க விடுவார்கள் என்றேன். (அதற்குப் பிறகுதான் வாக்காளர் பட்டியலில் பெயரை சரிபார்ப்பது எப்படி என்ற பதிவே எழுதினேன்.)

இங்கே கவனிக்க வேண்டிய விஷயம் - தேர்தலுக்கு ஒரு நாள் முன்புதான் அவர் இதைத் தேடிக்கொண்டிருந்தார். இருவருமே படித்தவர்கள்தான். பத்திருபது நாட்கள் முன்பே செய்திருக்கலாம் அல்லவா? ஒருவேளை, நான் தேடியபோதும் பட்டியலில் பெயர் கண்டுபிடிக்க முடியவில்லை என்று வைத்துக்கொள்வோம், முகவரி மாற்றச் சொன்னால் பெயரையே நீக்கி விட்டார்கள் என்பதே குற்றச்சாட்டாக இருந்திருக்கும் இல்லையா?

எனக்கு சென்னையில் வாக்கு இருக்கிறது. அடையாள அட்டை கோவையில் இருக்கிறது. நான் என்ன செய்யலாம் என்று கேட்டார் அதே பெண்மணி. தொகுதி, வாக்குச்சாவடி விவரமெல்லாம் தெரியும் என்றால், ஏதேனுமொரு அடையாள அட்டை எடுத்துக் கொண்டு செல்லுங்கள் என்று வழிகாட்டினேன். (2014, 2016 தேர்தல் நேரங்களிலும் இதேபோல பல பேருக்குத் தேடித் தந்திருக்கிறேன்.)

இந்த வலைதளத்தில் வாக்காளர் பட்டியலில் பெயர் இருக்கிறதா என்று யாரும் பார்க்கலாம். - https://electoralsearch.in/
*
முந்தாநாள் இன்னொரு சம்பவம். திருப்பூரில் வசித்து வந்த அக்கா இப்போது அன்னூரில் வசிக்கிறார். திருப்பூரில் போய் வாக்களிக்க வேண்டும். காரோ ஆட்டோவோ எடுத்துக்கொண்டு செல்லுங்கள், போய்வர 1000/2000 ரூபாய் ஆனாலும் பரவாயில்லை, வாக்களித்து விட்டு வாருங்கள் என்று சொன்னேன்.

இதிலும் கவனிக்க வேண்டிய விஷயம் - அவர் சில ஆண்டுகளுக்கு முன்னால் தில்லி வந்திருந்தபோது அவருடைய பர்ஸ் திருடு போய்விட்டது. அதில் இருந்த அடையாள அட்டையும் போய்விட்டது. நான்கைந்து நாட்களுக்கு முன்புதான் அவருடைய தொகுதியில் பட்டியலைத் தேடி, மேலே சொன்னது போல பார்ட் நம்பர், சீரியல் நம்பர் எல்லாம் எடுத்துக் கொடுத்தேன். ஆதார் அட்டை எடுத்துச் செல்லுங்கள், பூத் ஸ்லிப் இல்லாவிட்டாலும் இந்த விவரங்களைச் சொல்லி அடையாள அட்டையைக் காட்டி வாக்களிக்கலாம் என்றேன். அதேபோல நேற்று 1000 ரூபாய் செலவு செய்து ஆட்டோவில் போய் வாக்களித்து விட்டு வந்தார். தோழர் சுப்பராயனுக்கு ஒரு வாக்கு நிச்சயம்.
*
அக்காவின் பேரன் சென்னையில் வேலை செய்கிறான். அவன் வாக்களிக்க சென்னையிலிருந்து வருகிறான். அவனுடைய வோட்டர் ஐடி வந்து விட்டது. ஆனால் இன்னொரு பேரன் உள்ளூரிலேயே இருக்கிறான், அவனுடைய அடையாள அட்டை வரவில்லை.

நேற்று சுமார் 5 மணிநேரம் வலைதளத்தை அலசினேன். அக்காவின் மகள், மருமகன், பேரன் ஆகியோரின் அடையாள அட்டைகள் இருக்கிற பார்ட் நம்பர் மட்டுமல்லாமல், அதற்கு முந்தைய - பிந்தைய இரண்டு பார்ட்களையும் தேடினேன். மொத்தம் சுமார் 3500 வாக்காளர் பெயர்கள். அத்தனையும் தேடியும் பேரன் பெயர் கிடைக்கவில்லை. அதிலும், தமிழ்நாடு தேர்தல் ஆணையத்தளத்தில் வாக்காளர் பட்டியல் பிடிஎப் வடிவில் இருக்கும். அதில் டைப் செய்து தேட முடியாது. அது படமாக மாற்றப்பட்ட பிடிஎப். வரிசையாகப் படித்துத்தான் தேட முடியும்.

இரவு பதினொரு மணிக்கு அவனுக்கு போன் செய்தேன்.
நிஜமாகவே நீ அப்ளை செய்தாயா?
ஆமாம், அப்ளை செய்தேன்.
ஆன்லைனா?
இல்லை, விண்ணப்பத்தில் எழுதிக் கொடுத்தேன்.
இத்தனை நாட்களாக கேட்கவில்லையா?
இதோ வந்து விடும் என்று சொன்னார்கள்.
நீ செய்தது படு முட்டாள்தனம், விண்ணப்பம் கொடுத்து பல மாதங்கள் ஆகிவிட்டபிறகு, ஃபாலோஅப் செய்யாதது உன் தவறு. படித்தவர்களே இப்படிச் செய்யலாமா என்று நன்றாகத் திட்டி விட்டேன். ராஜாவுக்கு ஒரு வாக்கு குறைந்து விட்டதே என்று எனக்கு அவ்வளவு வருத்தம்.

இவன் பெயரைத் தேடும்போது இன்னொரு சுவையான சிக்கலும் எழுந்தது. அன்னூர் என்பது நீலகிரி நாடாளுமன்றத் தொகுதியின்கீழ், அவினாசி சட்டமன்றத் தொகுதியின்கீழ் வருகிறது. பட்டியலைத் தேடுவதற்கு முனைந்தபோது, நீலகிரி நாடாளுமன்றத் தொகுதியின் கீழே, ஊட்டி, குன்னூர், கூடலூர் ஆகிய மூன்று சட்டமன்றத் தொகுதிகள் மட்டுமே காட்டியது வலைதளம். அவினாசி காணவில்லை. அவினாசி கோவை மாவட்டத்தின்கீழ் வருகிறது என்றார்கள். ஆனால் கோவையின் கீழும் காணவில்லை. நானாகவே ஊகித்து, திருப்பூர் மாவட்டத்தின்கீழ் தேடியபோது, அவினாசி கிடைத்தது. அதில் அன்னூர் பட்டியல் கிடைத்தது.
அவினாசி, நீலகிரி நாடாளுமன்றத்தின் கீழான பட்டியலின்கீழ் அல்லவா வந்திருக்க வேண்டும்? அதெப்படி திருப்பூரின்கீழ் போடலாம்? ஆஹா... ஓஹோ... என்று பொங்கலாம். பொங்குவோம். அது அப்புறம். இப்போதைக்கு பட்டியல்தான் முக்கியம். அதற்கு நிதானம்தான் தேவை, ஆத்திரம் அல்ல.

பேரன் பெயரைத்தேடுவதற்காக 3 பட்டியல்களை வரிசையாகப் படித்துப் பார்க்கும்போது, குறைந்தபட்சம் ஐந்து பேரின் பெயர்கள் இரண்டு முறை இடம் பெற்றிருந்தன. அதுவும் அடுத்தடுத்து வந்தன. இது தேர்தல் அலுவலர்களின் குளறுபடிதான். ஆனால், அவர்களின் குளறுபடி மட்டும்தானா? ஒவ்வொரு முறை வாக்களிக்க நேரும்போதும் அந்த ஐந்து பேருக்குமான பூத் ஸ்லிப் கிடைத்திருக்கும் அல்லவா? இரண்டு பெயர்கள் இருக்கிறதே என்று, ஒன்றினை நீக்கச் சொல்லலாமே? இதில் நமது பொறுப்பு ஏதும் இல்லையா?
*
அக்கா வாக்களித்த விஷயம் மேலே சொன்னேன் அல்லவா... அவர் திருப்பூரில் சொந்த வீட்டில் வசித்து வந்தார். அக்காவின் மகன் இளம் வயதில் திடீரென இறந்து விட்டான். பறவைக்கூட்டில் கல் விழுந்தது போல ஆயிற்று. மருமகள் தன் தந்தை வீட்டுக்குச் சென்று விட்டார். தனியே வசிக்கப் பிடிக்காமல், என் அக்காவும் மைத்துனரும் தம் மகளுடன் வசிக்க அன்னூர் சென்று விட்டார்கள். அக்கா கணவரும் இரண்டு ஆண்டுகளுக்கு முன்பு மறைந்து விட்டார்.

வாக்காளர் பட்டியலில் அக்காவின் பெயரைத் தேடினேன் என்று சொன்னேன் அல்லவா, அப்போது பார்த்தேன் - மறைந்த மகன், அக்காவின் கணவர், மருமகள் எல்லாருடைய பெயர்களும் வாக்காளர் பட்டியலில் இருந்தன. (இதை அக்காவிடம் சொல்லவில்லை.)

இவ்வளவும் எதற்குச் சொல்கிறேன்?
மகனும் கணவரும் மறைந்த செய்தியை தேர்தல் ஆணையத்துக்குத் தெரிவித்து பட்டியலிலிருந்து நீக்கவில்லை. அதனால் அவர்களுடைய பெயர் இப்போதும் பட்டியலில் இருக்கிறது. தேர்தல் பணியாளர்கள் வாக்காளர் பட்டியல் வெரிபிகேஷன் வரும்போது விசாரித்திருப்பார்களே என்ற கேள்வி எழலாம். விசாரித்தும் இருக்கலாம், அவர்களுடைய சொந்த வீடு என்பதால் அப்படியே விட்டுவிட்டிருக்கலாம்.

பொதுவாக தேர்தல் அலுவலர்கள் தாமாக யார் பெயரையும் நீக்குவதில்லை. ஆயிரம் பேர் பட்டியலில் குறிப்பிட்ட சிலரின் பெயரை நீக்க அவர்கள் என்ன பங்காளிகளா பகையாளிகளா?
*
இப்போது நாகர்கோவில் தொகுதி விஷயத்துக்கு வருவோம். மீனவ கிராமங்களின் ஆயிரம் பேரின் பெயர்கள் பட்டியலில் இல்லை என்கிறார்கள். மொத்த கிராமத்தின் பல்லாயிரம் பேரின் பட்டியல் இல்லாமல் போவது என்பது சாத்தியமே இல்லை. ஒன்று, அது மிகைப்படுத்திய செய்தியாக இருக்க வேண்டும். அல்லது, திட்டமிட்டே நீக்கியிருக்க வேண்டும்.

திட்டமிட்டே நீக்கியிருக்கிறார்கள் என்று வைத்துக்கொள்வோம். எப்போது நீக்கினார்கள் என்று தெளிவாக அறிவது அவசியம். என்கிட்டே வோட்டர் ஐடி இருக்கு, ஆனா பட்டியலில் பேர் இல்லைஎன்று குமுறுவதில் பயனில்லை. போன தேர்தலில் ஓட்டுப்போட்டேன், இப்போது பட்டியலில் பெயர் இல்லைஎன்று சொல்வதிலும் பயனில்லை.

1993-95இல் நான் தில்லியில் ஆர்கேபுரத்தில் வசித்து வந்தேன். எங்களுக்கு ஆர்.கே. புரம் தொகுதியில் வாக்கு இருந்தது. அடையாள அட்டை இருந்தது. தேர்தலில் வாக்களித்தோம். பிறகு இந்திரபுரி போய்விட்டு, இரண்டு ஆண்டுகளுக்குள் அதையும் விட்டுவிட்டு இப்போது வசிக்கிற பகுதிக்கு குடிவந்தோம். அப்போது ஒரு தேர்தல் வந்தது. வெகு ஜோராக அடையாள அட்டையை எடுத்துக்கொண்டு நானும் மனைவியும் வாக்களிக்கப் போனோம். பட்டியலில் பெயர் இல்லை. முகவரி மாற்றாமல் விட்டது என் தவறு. வாக்களிக்காமல் திரும்பி வந்தோம். (அப்புறம் மறுபடி விண்ணப்பித்து அடையாள அட்டை பெற்றோம்.)
*
வாக்காளர் அட்டைக்கு விண்ணப்பம் செய்யுமாறு இளையமகளிடம் பல மாதங்களாக சொல்லிக்கொண்டிருந்தேன். அவளும் டேக்கா கொடுத்துக்கொண்டே இருந்தாள். கடந்த மாதம் பிடித்து இழுத்து விண்ணப்பம் செய்யச் சொன்னேன். ஆன்லைனில் செய்கிறேன் என்றாள். அதன்படி எல்லாமே சரியாக அப்லோடு செய்தோம். பத்து நாட்களுக்குள் தொலைபேசி அழைப்பு வந்தது. வெரிஃபை செய்ய வரப்போவதாக. அதேபோல வந்தார். அரைநிமிட வேலை. அடுத்த ஒரு வாரத்தில் அடையாள அட்டை வந்து விட்டது. பான்கார்டு போல பிளாஸ்டிக் அட்டை.
*
பத்தாண்டுகளாக பக்கத்து வீட்டில் வசிப்பவர்கள் நாகஜோதி சீதா தம்பதி. பேஸ்புக்கிலும் இருக்கிறார்கள். ஒரே மகள். பக்கத்து வீடு என்றால், இரண்டுக்கும் இடையே சுவர்தான் தடுப்பு. ஒவ்வொரு தேர்தலுக்கும் என்னிடம் வருவார் நாகஜோதி. தலைவா... லிஸ்ட்ல எங்க பேர் இருக்கான்னு பாருங்க. அவனுக பாட்டுக்கு தூக்கியிருக்கப் போறாங்க என்பார்.

தேர்தல் ஆணையத் தளத்தில் தேடி எடுத்து, பிரின்ட் எடுத்துக் கொடுப்பேன். ஒரு மாதத்துக்கு முன்பும் வந்தார். பட்டியலிலிருந்து பேர் எடுத்துட்டானுக. நான் போய் எழுதிக்குடுத்துட்டு வந்திருக்கேன். வந்துடுச்சா பாருங்க என்றார். பாப்பாவுக்கு (மகளுக்கு) இருக்கு, ஆனா எங்க பேரைத் தூக்கிட்டான் என்றார். அவருடைய பெயர் ஏன் நீக்கப்பட்டது?

நாங்கள் வசிப்பது டி-96. அவருடைய வாக்காளர் அட்டையில் இருந்த முகவரி 96. அது தவறான முகவரி. விண்ணப்பம் எழுதும்போது ஏற்பட்ட தவறு, அல்லது தேர்தல் அலுவலர் டைப் செய்யும்போது ஏற்பட்ட தவறு. ஆனால் நாகஜோதி அதை சரி செய்யவில்லை. வாக்காளர் சரிபார்ப்புக்கு வந்தவர்கள் 96 என்ற முகவரியில் போய் பார்த்திருப்பார்கள். அப்படி யாரும் இல்லை என்று தெரிய வந்திருக்கும். நீக்கி விட்டார்கள். மகள் பெயர் பட்டியலில் இருந்தது எப்படியென்றால், மகள் கொடுத்த விண்ணப்பத்தில் டி-96 என்று முகவரி சரியாகவே இருக்கிறது. எனவே நீக்கவில்லை. (முந்தாநாள் அவருக்கும் புதிய அட்டைகள் வந்து விட்டன.)
*
வாக்காளர் பட்டியலில் பெயர் இருக்கிறதா என்று சரிபார்த்துக் கொள்ளுங்கள் என்று பல மாதங்களாக தொடர்ந்து விளம்பரங்களும் அறிவிப்புகளும் வந்து கொண்டே இருந்தன அல்லவா? வாக்காளர்கள் சரிபார்க்க வேண்டும். வாக்காளர்கள்தான் அப்பாவிகள், சரிபார்க்கத் தெரியவில்லை என்று வைத்துக் கொள்வோம். கட்சிக்காரர்கள் என்ன செய்திருக்க வேண்டும்? அவர்கள் முனைப்பாக செயல்பட்டு சரிபார்த்திருக்க வேண்டாமா? இங்கே பேஸ்புக்கில்கூட ஏதோ சில அமைப்புகள் வெளியிட்ட சுற்றறிக்கைகள் பார்த்தேன். வாக்காளர் பட்டியலில் தம் பெயர் இருக்கிறதா என்று பார்க்கச் சொல்லி எச்சரித்த சுற்றறிக்கை அது. இதுபோல ஒவ்வொரு கட்சிக்காரரும் தத்தம் பகுதியில் செய்திருக்க வேண்டும். வாக்களிப்பு நாளுக்கு முன்பு பூத் ஸ்லிப்கள் கொடுப்பதற்காக வீடு வீடாகப் போகிறார்களே, அதேபோல வாக்காளர் பட்டியல் விஷயத்துக்காகவும் போயிருக்க வேண்டாமா? அப்போது செய்யாமல் கோட்டை விட்டு விட்டு, இப்போது பொங்கினால் பயன் என்ன?

நான் அறிந்தவரையில், வாக்களிப்பு நாளுக்கு 15 நாட்கள் முன்புவரை வாக்காளர் பட்டியல் திருத்தம் நடந்து கொண்டிருக்கும். ஒருவேளை, பதினைந்து நாட்களுக்குள் முன்னால் பட்டியலில் பெயர் இருந்தது, அதற்குப் பிறகுதான் காணாமல் போனது என்றால், அதற்கான ஆதாரங்களுடன் நீதிமன்றத்தின் கதவைத் தட்டலாம். அதுவும் ஓகி புயலால் பாதிக்கப்பட்ட கிராமத்தில் மொத்தமாக பெயர்கள் நீக்கப்பட்டன என்றால், நீதிமன்றத்தில் புகார் செய்வதற்கான வலிமை அதிகம்.

தேர்தல் ஆணையம் பாஜகவுக்கு சாதகமாகத்தான் இருக்கிறது, வரலாற்றில் இல்லாத அளவுக்கு சுயேச்சை அதிகாரத்தை விட்டுவிட்டு ஆளும் கட்சியின் அடியாளாகச் செயல்படுகிறது என்பதில் எனக்கு எந்த கருத்து மாறுபாடும் கிடையாது.

ஆனால், வாக்காளர் பட்டியல் விஷயத்தில் நம்முடைய தவறு என்ன என்று சுயபரிசீலனை செய்து கொள்வது அவசியம். அதைச் செய்யாமல் வெறுமனே பொங்கிக் கொண்டு இருப்பதால் எந்தப் பயனும் இல்லை.

உரிமைகளைக் கோரும்போது கடமைகளையும் கொஞ்சம் நினைவுபடுத்திக் கொள்வோம்.

பேஸ்புக்கில் பதிவு போடுகிற, படம் போடுகிற அக்கறையில் ஒரு சிறுபகுதியை நம் அண்டை வீட்டுக்காரர்களுக்கும் காட்டலாம். வாக்காளர் பட்டியலில் பெயர் இருக்கிறதா என்று தேடிப்பார்த்துத் தரலாம்.

அதிலும் குறிப்பாக, ஒரு கட்சி அனுதாபி, கட்சித் தொண்டர், கட்சிக்காக செயல்படுகிறவராக இருந்தால், அந்தப் பகுதி முழுக்கவும் இதைச் செய்ய வேண்டும். அதுதான் மக்களுடைய தொடர்பையும் வலுப்படுத்தும். ஆதரவையும் தக்க வைக்கும். இன்று பாஜக இதை மிக நன்றாகவே செய்து வருகிறது என்பது எதார்த்தம். பேஸ்புக்கில் பதிவு போட்டுவிட்டதாலோ,தேர்தல் அறிக்கை வெளியிட்டு விட்டதாலோ மக்கள் ஆதரவு தந்து விட மாட்டார்கள். மக்களின் ஆதரவுக்கு அவர்களுடன் நேரடித் தொடர்பில் இருக்க வேண்டும்.

குறைந்தபட்சம் அடுத்த தேர்தலுக்கான பாடமாக இருக்கட்டும் என்பதற்காகவே இதை எழுதுகிறேன். குறிப்பாக எந்தக் கட்சிக்காகவும் அல்ல, எல்லாருக்குமான பாடம் இது.

தேரதல் பாடங்கள் தொடரும்...

Wednesday, 14 November 2018

சர்க்கரை நோய் தினம் 2018


நவம்பர் 14 - உலக நீரிழிவு நோய் தினம். இந்த ஆண்டுக்கான நீரிழிவு நோய் தினத்துக்கான மையக் கருத்து : சர்க்கரை நோயும் குடும்பமும்

இப்போது சர்க்கரை நோயாளிகளின் எண்ணிக்கை 42 கோடிக்கும் அதிகம் (2014 கணக்கு). இவர்களில் பெரும்பாலோர் டைப் 2 வகை சர்க்கரை நோயாளிகள்தான். டைப் 2 வகை சர்க்கரை நோயை உடற்பயிற்சி, சமச்சீர் உணவு, ஆரோக்கியமான வாழ்க்கைச் சூழல் ஆகியவற்றால் பெருமளவுக்கு கட்டுப்படுத்த முடியும். இதில் குடும்பம் பெருமளவுக்குப் பங்களிக்க முடியும். அதனால்தான் 2018-19 ஆகிய இரண்டு ஆண்டுகளுக்கும் சர்க்கரை நோயும் குடும்பமும்என்பதே மையக்கருத்தாக ஏற்கப்பட்டுள்ளது. (கடந்த ஆண்டின் மையக்கருத்து - பெண்களும்நீரிழிவு நோயும்.)

சர்க்கரை நோய் உள்ளவர்களில் 2 பேரில் ஒருவருக்கு சர்க்கரை நோய் இருப்பதே தெரியாது. சர்க்கரை நோயை ஆரம்பத்திலேயே கண்டறிவதுதான் அதனால் ஏற்படும் சிக்கல்களைத் தவிர்க்க / சமாளிக்க உகந்த வழியாகும். குடும்பத்தில் ஒருவருக்கு சர்க்கரை நோய் வந்தால், அதன் தாக்கம் குடும்பம் முழுவதையும் பாதிக்கும்.

சர்க்கரை நோய் சிகிச்சை செலவு பிடிக்கக்கூடியது. சர்க்கரை நோய் சிகிச்சையும் மருந்துகளும் அனைவருக்கும் எட்டும்படி இருக்க வேண்டும். ஆனால் அப்படி இல்லை என்பதே நிதர்சனம். அன்றாடம் இன்சுலின் மருந்துக்கும், சர்க்கரை நோய் கண்காணிப்புக்குமான செலவு, அல்லது டயாலிசிஸ் செலவு போன்றவை குடும்பத்தின் வருவாயில் பெரும்பகுதியை விழுங்கிவிடும். இன்னும் பலருக்கு, சிகிச்சையும் மருந்துகளும் எட்டாதவை. இன்னும் பலர் சரக்கரை நோய் விழிப்புணர்வே இல்லாதவர்கள்.


சர்க்கரை நோய் உள்ளவர்களுக்கு குடும்பத்தினரின் ஆதரவு மிக முக்கியம். சிகிச்சையில் மட்டுமல்ல, சிகிச்சைக்குப் பிந்தைய கவனிப்பிலும், உணவு முறையிலும் ஊக்கம் தருவதிலும் குடும்பத்தினர் பங்கு அதிகம். பொதுவாக சர்க்கரை நோயாளிகளில் 90 விழுக்காடு டைப் 2 வகையினர்தான். வாழ்க்கை முறை மாற்றங்களால் இதை கட்டுப்படுத்த முடியும் என்னும்போது, சர்க்கரை நோய் விழிப்புணர்வு மட்டுமே இதைச் செய்ய முடியும்.

சர்க்கரை நோய், என்றால் என்ன, டைப் 1, டைப் 2 வகைகள் என்றால் என்ன?
குளுக்கோஸ், உடலுக்குத் தேவையான எரிபொருள் ஆகும். நமது உணவுகளிலிருந்து இது கிடைக்கிறது. ஆனால் இந்த குளுக்கோஸ் உடலின் செல்களில் நுழைவதற்கு, இன்சுலின் தேவை. கணையம் என்கிற உறுப்பு அந்த இன்சுலினை உற்பத்தி செய்கிறது. ஆக, உடலின் ஆற்றலுக்கான எரிபொருள் கிடைப்பதற்கு இன்சுலின் தேவை. டைப் 1 வகை சர்க்கரை நோய் உள்ளவர்களுக்கு இன்சுலின் சுரப்பு இருக்காது. டைப் 2 வகையினருக்கு, போதுமான அளவுக்கு இன்சுலின் சுரக்காது, அல்லது சுரக்கும் இன்சுலினை உடல் சரியாகப் பயன்படுத்தாது. (டைப் 1, டைப் 2 தவிர வேறு சில வகைகளும் உண்டு.) இரண்டு வகை நோய்களுமே, செல்களுக்கு குளுக்கோஸை அனுப்பாமல், ரத்தத்தில் குளுக்கோஸ் அளவை அதிகரிக்கச் செய்யும். ரத்தத்தில் குளுக்கோஸ் அளவு உயரும்போது, பல்வேறு சிக்கல்கள் ஏற்படும். இதுதான் சர்க்கரை நோய், அல்லது நீரிழிவு நோய் எனப்படும்.

சர்க்கரை நோயின் அறிகுறிகள் என்ன?
  அடிக்கடி சிறுநீர் கழிதல்
 தாகம் மிகவும் அதிகரித்தல், தண்ணீர் நிறைய அருந்த வேண்டியிருத்தல்
  பசியுணர்வு அதிகரித்தல்
  களைப்பாக உணர்தல்
  பார்வைத்திறன் மங்குதல்
  காயங்கள் சீக்கிரமாக ஆறாமல் இருத்தல்
இவை பொதுவான அறிகுறிகள். இதைத்தவிர, கைகால்கள் மரத்துப்போவது போன்ற வேறு அறிகுறிகளும் இருக்கலாம்.

டைப் 1 வகை சர்க்கரை நோய் விரைவாக தன் வேலையைக் காட்டும். ஆனால் டைப் 2 வகையினரில் பெரும்பாலோருக்கு சர்க்கரை நோயின் அறிகுறிகள் உடனே தெரியாமல் போகலாம், பல காலத்துக்குப் பிறகே தெரிய வரக்கூடும். அப்போது சிக்கல்கள் முற்றியிருக்கும்.

சர்க்கரை நோயால் ஏற்படக்கூடிய முக்கியச் சிக்கல்கள்
 இதய நோய்
 பக்கவாதம்
 சிறுநீரக செயலிழப்பு
 பார்வைத் திறன் இழப்பு
 காயங்கள் ஆறாதபோது, உறுப்புகள் நீக்கப்படுதல்


டைப் 2 வகை சர்க்கரை நோய் யார் யாருக்கு வரக்கூடும்?
 உடல் எடை அதிகமாக இருப்பவர்கள்
 குடும்பத்தில் ரத்த உறவுகளுக்கு சர்க்கரை நோய் இருத்தல்
 45 வயதுக்கு மேற்பட்டவர்கள்
 உடற்பயிற்சி ஏதும் செய்யாதவர்கள்
 பிரசவ கால சர்க்கரை நோய்க்கு ஆளானவர்கள்
 அதிக எடை கொண்ட குழந்தையைப் பிரசவித்தவர்கள்
 தொப்பை உள்ளவர்கள்
 ஆரோக்கிய உணவு முறையைப் பின்பற்றாதவர்கள்

இந்தியாவில் 8.7 சதவிகிதம் பேருக்கு சர்க்கரை நோய் இருக்கிறது. சர்க்கரை நோய் உள்ளவர்களின் எண்ணிக்கையில் உலகிலேயே முதலிடத்தில் இருக்கிறது இந்தியா. சர்க்கரை நோய் கண்டறியப்படாதவர்கள் எண்ணிக்கையும் ஐந்து கோடி இருக்கலாம் என மதிப்பிடப்பட்டுள்ளது. குழந்தைகள் மத்தியில் சர்க்கரை நோய் அதிகரித்து வருவது இன்னும் ஆபத்தான விஷயம்.

நாமும் சர்க்கரை நோயாளிகளில் ஒருவராக இல்லாதிருக்க, அல்லது சர்க்கரை நோயைக் கட்டுப்படுத்த என்ன செய்யலாம்?

   அறிகுறிகளை ஆரம்பத்திலேயே கண்டறியலாம்.
   ஆரோக்கியமான சமச்சீர் உணவைப் பின்பற்றலாம்
   சர்க்கரைச் சத்தும் கொழுப்பும் உள்ள உணவுகளைத் தவிர்க்கலாம்
   உடற்பயிற்சிகளைத் தொடர்ந்து செய்யலாம்
   உடல் எடையைக் கட்டுக்குள் வைத்திருக்கலாம்
   பதப்படுத்திய உணவுகளைத் தவிர்த்து, நார்ச்சத்து உணவுகளை அதிகம் எடுக்கலாம்.
   புகை மற்றும் மதுப்பழக்கத்தை விட்டொழிக்கலாம்.

*

பி.கு. 1 – சர்க்கரை நோயால் பெரிதும் பாதிக்கப்படுபவர்கள் பெண்கள், ஆனால் குறைவாக கவனிக்கப்படுபவர்களும் பெண்கள்தான். கடந்த ஆண்டின் மையக்கருத்தான பெண்களும் நீரிழிவு நோயும்என்ற தலைப்பை முன்வைத்து எழுதிய கட்டுரையை இந்த இணைப்பில் கிளிக் செய்து வாசிக்கலாம்.

Friday, 26 October 2018

புத்தி கொள்முதல்


1988-89 என்று நினைவு. சென்னையில் பெரியதோர் அச்சகத்தின் முழு நிர்வாகி நான். எனக்கும் மேலே பெரியவர் ஒருவர்.

ஆந்திரத்திலிருந்து மூன்று பேர் வந்தார்கள். தெலுங்கில் ஒரு நூல் அவசரமாக அச்சிட வேண்டும் என்றார்கள். நூலை தட்டச்சு செய்து, பிரின்ட் செய்வதற்கு ரெடியாக பேஜ் செட்டிங்கும் செய்து வைத்திருந்தார்கள். 120 பக்கம்தான் இருக்கும். 10 ஆயிரம் பிரதிகள் ஆர்டர் என்று நினைவு.

அவசரம் என்பதால் ரொக்கப் பணமாகவே தருவதாகச் சொன்னார்கள். இப்படி வாடிக்கையாளர்கள் அடிக்கடி வருவது இல்லையே! அச்சுக்கூலி கொஞ்சம் அதிகமாகவே சொன்னேன். நான் சொன்ன தொகையில் பெரும்பகுதியை ரொக்கமாக அட்வான்ஸ் கொடுத்து விட்டார்கள். மொத்தமாக 60-70 ரீம் பேப்பருக்கு ரொக்கமாக ஆர்டர் கொடுக்க முடிந்ததால், ஏற்கெனவே நாங்கள் கடன் நிலுவை வைத்திருந்த பேப்பர் டீலருக்கும் ஒரு சந்தோஷம். அடுத்த சில நாட்களுக்கு பணம் கேட்டு தொல்லை செய்ய மாட்டார். ஆக, இது எல்லாருக்கும் வின்-வின் டீல்தான். வெள்ளிக்கிழமை கொடுத்தார்கள். உடனே நெகடிவ் போட்டு, பிளேட் போடச்சொல்லி, ஞாயிற்றுக்கிழமைக்குள் நூலை அச்சிட்டு விட்டேன். பின்னிங்கும் முடிந்தது. கட்டிங் மட்டுமே செய்ய வேண்டும்.

எனக்கும் மேலே இருக்கும் பெரியவர் திங்கள்கிழமை வந்தபோது பெருமையாக விவரம் சொல்லி, இப்படி இப்படி ஒரு பார்ட்டி வந்து, அட்வான்ஸ் பணம் வாங்கி விட்டேன் என்றேன்.

அப்படியா என்று சொன்னவர், ஒரு புத்தகத்தைக் கொண்டு வருமாறு சொன்னார். கைக்கு வந்த புத்தகத்தை திருப்பிப் பார்த்தார். எல்லாம் தெலுங்கு. எனக்கும் புரியாது, அவருக்கும் புரியாது. ஆனால் நடுவே சில படங்கள் இருந்தன. நான் கவனிக்காத படங்கள் அவை.

ஏதோவொரு மஞ்சள் பத்திரிகையிலிருந்து எடுக்கப்பட்ட தரம்கெட்ட படங்கள். அதில் என்.டி. ராமாராவ் யாரோ பெண்ணுடன் சல்லாபம் செய்வதான படங்களும் இருந்தது. அது தேர்தல் நேரம். ராமாராவை வீழ்த்துவதற்காக எதிர்க்கட்சிகள் தயார் செய்த புத்தகம் அது. நான்தான் கவனிக்கவில்லை.

பாத்தீங்களா என்றார்.

நான் பேச்சறறு நின்றிருந்தேன். அவருடைய அனுபவம் எனக்கு இல்லை. நிறையப் பணம் தரக்கூடிய ஒரு வாடி்கையாளர் கிடைத்தார் என்று நான் நினைத்தேன். அவரோ, ஏன் அந்த வாடிக்கையாளர் நிறையப் பணம் கொடுக்க முன்வந்தார் என நினைத்தார்.

பெரியவர் தலையைச் சொறிந்தார், அதாவது, தன் சொட்டைத் தலையைத் தடவிக் கொண்டார். தீவிரமாக யோசிக்கும்போது இப்படிச் செய்வது அவர் வழக்கம்.

புத்தகம் டெலிவரி ஆயிடுச்சா என்று கேட்டார். இல்லை என்றேன். எங்கே இருக்கு என்றார். கட்டிங் டேபிளில் இருக்கு என்றேன்.

உள்ளே போனார். கட்டிங் ஆளைக் கூப்பிட்டு, மொத்தப் புத்தகங்களையும் பீஸ் பீஸாக வெட்டி துண்டுகளாக்கி வேஸ்டில் போடச் சொன்னார்.

மீண்டும் நாங்கள் அறைக்கு வந்தோம்.
பணம் குடுத்த பார்ட்டி வந்தால் என்ன சொல்வது என்று கேட்டேன்.
பிரின்ட் செய்ய முடியாதுன்னு சொல்லிடுங்க என்றார்.
அட்வான்ஸ் குடுத்திருக்காங்களே என்று கேட்டேன்.
அட்வான்ஸ் திருப்பித் தரச் சொல்லி ரொம்ப பிரச்சினை செய்ய மாட்டானுக. ரொம்ப கேட்டானுகன்னா திருப்பிக் குடுத்துடலாம் என்றார்.
அப்போ பேப்பருக்கான காசும் உழைப்பும் அவ்வளவும் நஷ்டம் இல்லையான்னு கேட்டேன்.

புத்தி கொள்முதல்என்றார்.



அப்போதுதான் புத்தி கொள்முதல் என்ற வார்த்தையை முதன்முதலாகக் கேட்டேன். இப்போதும் அந்தப்பாடம் நினைவில் இருக்கிறது.
*
புத்தி கொள்முதல் என்பது ஒரு விஷயத்தில் முதல் தடவை அடி பட்டதும் விழித்துக்கொள்வது. எப்போதும் மூளைக்குள் இருத்தி எச்சரிக்கையாக இருக்க வேண்டியது.

ஒரு விஷயத்தில் ஒருவரிடம் பட்ட பிறகு, மறுபடி மறுபடி அவரிடமே பட்டதாகச் சொன்னால், அது புத்தி கொள்முதல் அல்ல.

மொழியாக்கத்தின் வாயிலில்....

இது 2013இல் எழுதிய கட்டுரை. இப்போதுதான் இங்கே பகிர்கிறேன்.

சாகித்ய அகாதமியின் மொழியாக்க விருது பெற்ற திரு பாலசுப்பிரமணியன் வந்திருந்தார்.  எடிட்டிங் குறித்து ஒரு நிகழ்வில் உரையாற்ற இருந்தார். அதைப்பற்றி உரையாடிக் கொண்டிருந்தோம். அப்போது மொழியாக்கம் குறித்தும் பேச்சு வந்தது. மொழியாக்கத்தில் சுவையான சம்பவம் ஏதும் இருந்தால் கூறுங்கள் என்று கேட்டார்.


1996ஆம் ஆண்டு வாக்கில் நடந்தது இது. அப்போதுதான் நான் புதிதாக டெஸ்க்டாப் பப்ளிஷிங் தொழில் தொடங்கியிருந்தேன். நேஷனல் புக் டிரஸ்ட் அலுவலகத்தில் பல்பீர் சிங் என்றொரு அதிகாரி இருந்தார். அவர்தான் தமிழ் நூல்கள் உற்பத்திப் பொறுப்பையும் கவனித்துக் கொண்டிருந்தார். எனக்கு இனிய நண்பர். தில்லி வருவதற்கு முன்பு சென்னையில் நான் வசித்த காலத்திலேயே அச்சகப் பணிகள் தொடர்பாக அவருடன் அறிமுகம் உண்டு. 

ஒருநாள் வழக்கம்போல அந்த அலுவலகத்துக்குப் போனபோது, என்னிடம் ஒரு தாளைக் கொடுத்து, தமிழில் பிழைதிருத்தம் பார்த்துத் தருமாறு கேட்டார். தில்லியில் கணினியில் நூல்களை வடிவமைக்கிற, விளம்பரங்கள் மற்றும் பல வகையான பணிகளை மொழியாக்கம் செய்கிற ஒரு நிறுவனத்திற்கு வந்திருந்த மொழியாக்க வேலை அது. அவர்கள் யாரையோ வைத்து மொழியாக்கம் செய்த பிறகு, தமிழ் தெரிந்த யாரிடமாவது சரிபார்த்துத் தருமாறு பல்பீர் சிங்கிடம் அனுப்பியிருந்தார்கள். பல்பீர் சிங்தான் தமிழ் அச்சுப் பணிகளுக்குப் பொறுப்பாளர் என்பதால் அவருக்கு தில்லியில் தமிழர்களோடும் தொடர்பு உண்டு என்பதே காரணம்.

நான் அந்தத் தாளை வாங்கிப் படிக்க ஆரம்பித்தேன். ஆங்கில வடிவம் எங்கே என்று அவரிடம் கேட்டேன். அதையெல்லாம் விடுப்பா, தமிழில் தவறு இருந்தால் மட்டும் பார்த்துக்கொடு (வடையை எண்ணச் சொன்னா துளையை எண்ணாதே) என்று சர்தார்ஜி பாணியில் பதிலளித்தார் பல்பீர் சிங்.

ஈழத்திலிருந்து புலம்பெயரும் தமிழர்கள் ஐரோப்பிய நாடுகளுக்கு தஞ்சம் புகச் சென்று கொண்டிருந்த காலம் அது. ஜெர்மனி, டென்மார்க், பிரான்ஸ், நார்வே உள்ளிட்ட ஐரோப்பிய நாடுகள் இலங்கை அகதிகளுக்கு புகலிடம் கொடுத்து வந்தன. அவற்றில், குறிப்பிட்ட ஒரு ஐரோப்பிய நாட்டிற்கு அகதியாக வருவோர் எப்படி வரலாம், எங்கெங்கே அகதியாக நுழையலாம், அவர்களுக்கு என்னென்ன உரிமைகள் உண்டு என்கிற தகவல்கள்தான் அந்தத் தாளில் இருந்தது. ஐரோப்பிய நாடுகளுக்கே உரித்தான மனித உரிமை அக்கறையால், இலங்கைத் தமிழர்களுக்கும் புரியும் வகையில் தமிழிலும் தருவதென அவர்கள் முடிவு செய்திருந்தார்கள். அதைத்தான் நான் சரிபார்க்கத் துவங்கினேன்.

அதில் இருந்த வாசகங்களில் ஒன்று இது -
"உங்கள் பாலுணர்வு ஈடுபாட்டின் காரணமாக, நீங்கள் விரும்பினால், விசாரணையின்போது ஒரு பெண்ணை நீங்கள் ஏற்பாடு செய்துகொள்ள உங்களுக்கு உரிமை உண்டு."

படித்ததும் அதிர்ந்து போனேன். பல்பீர் சிங்குக்கு இதை ஆங்கிலத்தில் புரிய வைத்து, தொலைபேசியில் அந்த நிறுவனத்தை அழைத்து ஆங்கில வாசகத்தை படித்துக்காட்டச் சொன்னேன். அந்த வாசகம் -
Due to your sexual preferences, if you wanted to be interrogated by a female, you are entitled to get the same.

அதாவது, அகதியாகத் தஞ்சம் கோரி வருபவர் ஒரு பெண்ணாக இருந்தால், ஒரு பெண் அதிகாரிதான் தன்னை விசாரிக்க வேண்டும் என்று கேட்பதற்கு அவருக்கு உரிமை உண்டு. இதைத்தான் அப்படி வார்த்தைக்கு வார்த்தை மொழியாக்கம் செய்து அசத்தியிருந்தார் யாரோ ஒரு தமிழர்.

அப்போதுதான் முடிவு செய்தேன், நானும் மொழியாக்கத்தில் ஈடுபடுவதென. இப்போதும் அதே போன்ற அபத்தங்கள் நிறையவே காணக் கிடைக்கின்றன என்றாலும் இதை மட்டும் என்னால் மறக்கவே முடியாது.